Mar 15 | NdeIBE | STEP | Ekuseni kakhulu abaphristi abakhulu, labadala, labafundisi bomthetho kanye leSanihedirini yonke bavumelana ngesinqumo sabo. Bambopha uJesu bamqhuba bayamethula kuPhilathu.

Mark 15

UJesu Ephambi KukaPhilathu

1 Ekuseni kakhulu abaphristi abakhulu, labadala, labafundisi bomthetho kanye leSanihedirini yonke bavumelana ngesinqumo sabo. Bambopha uJesu bamqhuba bayamethula kuPhilathu.

2 UPhilathu wambuza wathi, “Uyinkosi yamaJuda na?” UJesu waphendula wathi, “Yebo, njengoba usitsho nje.”

3 Abaphristi abakhulu bamethesa amacala amanengi. 4 Ngakho uPhilathu wambuza njalo wathi, “Kanti kungani ungaphenduli na? Khangela, bakubeka amacala amanengi.”

5 Kodwa uJesu wala elokhu ethule, uPhilathu wamangala.

6 Kwakungumkhubo ukuthi ngeDili kukhululwe isibotshwa esasizabe sicelwe ngabantu. 7 Indoda eyayithiwa nguBharaba yayisentolongweni kanye labahlamuki ababebulele abantu kulowomvukela.

8 Ixuku labantu leza kuPhilathu ukuthi abenzele leyo nhlalayenza.

9 UPhilathu wabuza wathi, “Lifuna ukuthi ngilikhululele inkosi yabaJuda na?” 10 Wayesazi ukuthi abaphristi abakhulu babenikele uJesu kuye ngenxa yomhawu. 11 Kodwa abaphristi abakhulu badunga abantu babakhuthaza ukuthi bacele uPhilathu abakhululele uBharaba.

12 UPhilathu wasebabuza wathi, “Pho ngithini ngalo elimbiza ngokuthi uyinkosi yamaJuda na?”

13 Bamemeza bathi, “Mbethele!”

14 UPhilathu wabuza wathi, “Yindaba? Wenze cala bani kanti?” Kodwa bamemeza ngamandla bathi, “Mbethele!”

15 UPhilathu wasebakhululela uBharaba ngokuba wayefuna ukusuthisa ixuku labantu. Wathi uJesu katshaywe, ngemva kwalokho wasebapha ukuba bambethele.

Amabutho Ahoza UJesu

16 Amabutho amqhuba uJesu amusa esigodlweni (kutshiwo iPhrethoriyamu) basebebiza iviyo lonke lamabutho laqoqana ndawonye.

17 Bamgqokisa ijazi eliyibubende, base beseluka umqhele wameva bamethesa wona.

18 Basebememeza besithi kuye, “Bayethe, nkosi yamaJuda!”

19 Bamtshaya ekhanda ngomqwayi baphindaphinda, bamkhafulela. Baguqa phansi ngamadolo bamkhonza.

20 Sebemhozile, bamhlubula ijazi eliyibubende bamgqokisa ezakhe izigqoko. Basebephuma laye bamqhuba ukuba bayombethela.

Ukubethelwa

21 Indoda ethile yaseKhureni, eyayithiwa nguSimoni, uyise ka-Alekizanda loRufu, wayezedlulela khonapho evela emaphandleni, basebembamba ngamandla ukuthi athwale isiphambano. 22 Baletha uJesu endaweni eyayithiwa yiGoligotha (okutsho ukuthi, Indawo yoKhakhayi). 23 Basebemupha iwayini elihlanganiswe lemure, kodwa wala ukulinatha.

24 Base bembethela. Bahlukanisa izigqoko zakhe base besenza inkatho ukuze babone ukuthi ngulowo athathe kuphi.

25 Kwakulihora lesithathu isikhathi abambethela ngaso. 26 Umbhalo owaphanyekwayo owecala lakhe wawusithi: INKOSI YAMAJUDA.

27 Babethela kanye laye abaphangi ababili, omunye ekunene kwakhe, omunye kwesokhohlo. ( 28 Kwagcwaliseka umbhalo othi, “Wabalwa ndawonye lezephulamthetho.”)

29 Labo ababedlula lapho babemthuka benikina amakhanda abo besithi, “Ehe! Wena ozadiliza ithempeli ulakhe ngezinsuku ezintathu, 30 yehla esiphambanweni uzisindise!”

31 Ngaleyondlela labaphristi abakhulu labafundisi bomthetho bamhoza bahlekisana ngaye bathi, “Wasindisa abanye, kodwa uyehluleka ukuzisindisa yena! 32 Ake kuthi uKhristu lo, iNkosi le yako-Israyeli, yehle esiphambanweni ukuze sibone, sikholwe.” Lalabo ayebethelwe kanye labo, labo babemhlambaza.

Ukufa KukaJesu

33 Ngehora lesithupha ubumnyama bembesa ilizwe lonke kwaze kwaba lihora lesificamunwe munye. 34 Kwathi ngehora lesificamunwe munye uJesu wakhala ngelizwi elikhulu wathi, “Eloyi, Eloyi, lamasabakithani?” – okutsho ukuthi, “Nkulunkulu wami, Nkulunkulu wami, usungitshiyelani na?”

35 Kwathi abanye balabo ababemi eduzane bekuzwa lokho bathi, “Zwanini, ubiza u-Elija.”

36 Enye indoda yagxamuza isipontshi phakathi kweviniga yewayini oluthini yaluqhubela uJesu ukuthi anathe. Yasisithi, “Ake simyekele manje, kesibone ingabe u-Elija uzakuza azomehlisa.”

37 UJesu wahlaba umkhosi, wasuphuma kuye umphefumulo.

38 Ikhetheni lethempeli ladabuka kabili lisuka phezulu kusiya phansi. 39 Kwathi induna yekhulu eyayimi khonapho phambi kukaJesu isizwa ukukhala kwakhe njalo ikubonile ukuthi ufe kanjani yathi, “Ngeqiniso indoda le ibe iyiNdodana kaNkulunkulu!”

40 Abanye abesifazana babebukele bekude. Phakathi kwabo kwakuloMariya Magadalena loMariya unina kaJakhobe omncinyane lokaJose loSalome. 41 Laba abesifazana babemlandele bamenzela akuswelayo eseGalile. Labanye abesifazana abanengi ababeze laye eJerusalema labo babekhona.

Ukungcwatshwa KukaJesu

42 Kwakulusuku lokuLungiselela (kutsho usuku olwandulela iSabatha). Kwathi sekuntambama

43 uJosefa wase-Arimathiya indoda elesithunzi eNkundleni, yona ngokwayo eyayilindele umbuso kaNkulunkulu, yaqunga isibindi yaya kuPhilathu yacela isidumbu sikaJesu. 44 UPhilathu wamangala ukuthi wayesefile. Wabiza induna yekhulu wayibuza ukuthi uJesu wayesefile yini. 45 Wathi esezwile ngenduna yekhulu ukuthi kwasekwenzakele, wamupha uJosefa isidumbu. 46 Ngakho uJosefa wasethenga amalembu elineni, wathatha isidumbu wasigoqela ngelineni wasibeka ethuneni elaligujwe edwaleni. Wasegiqela ilitshe emlonyeni wethuna. 47 UMariya Magadalena loMariya unina kaJesu babona lapho abekwa khona.